Shoqëria
& Kultura | 17.03.2011
Të jesh pjesë e "Udhëve" - ekspozitë
e piktorit Arben Kucana
Në mjediset e Ambasadës Gjermane në Tiranë
u hap ekspozita "Udhët" e piktorit shqiptaro-gjerman
Arben Kucana. Autori e paraqet udhën e tij krijuese,
si një marrëdhënie dykalimshe mes kulturës
shqiptare e asaj gjermane.
Udhë
që bashkohen, ndahen, gjarpërojnë në
një labirinth pafund. Udhë që nisin dhe nuk
mbërrijnë askund. Rrathë që lidhen dhe
rrinë më vete. Të gjitha në një
raport të përhershën me njëra tjetrën,
si në një dimension pafund të kohës
ku jetojmë.
Vetë
jeta e piktorit Arben Kucana i ngjan një udhe, që
nuk i duket fundi. Pafundësi e saj nisi më 2 korrik
1990, kur ai u fut refugjat në ambasadën gjermane
në Tiranë në kërkim të një
bote të lirë dhe njëherazi si rebelim ndaj
regjimit komunist. Një hapësirë e pamatë
lirie artistike, eksperimentimesh për të njohur
veten do t' i hapej piktorit të ri 23 vjeçar,
talentin e të cilit e kishte prangosur dogma e Realizmit
Socialist.
Gjermania
u bë atdheu i tij i adaptuar, që i dha mundësi
të formoje identitetin e tij artistik. Pas më
shumë se 20 vitesh ai rikthehet tani në Shqipëri,
në atdheun e tij të origjinës per te treguar
me gjuhën e artit përvojat e tij jetësore,
artistike.
Çfarë
simbolizojnë "Udhët" për piktorin
Arben Kucana?
Piktori shpreh kredon e tij artistike për tematikën
e zgjedhur: "Udhët janë për mua koha
ku ne jetojmë, lëvizja, momenti. Unë vetë
jam pjesë e udhës në një "concept
abstract". Për mua udhët nuk janë gjë
tjetër veçse shuma e shpirtrave dhe figuracioneve,
që përplasen në një vend të caktuar.
Kjo do të thotë nga pikëpamja figurative
që shenja dhe forma të caktuara krijojnë
një tërësi. Kjo është udha."
Gjermania-
në avanguardë të pikturës bashkëkohore.
Në
këtë udhë pa fund, Gjermania është
një stacion që i ka dhënë shumë
piktorit Arben Kucana. Mbi të gjitha konceptet e artit
modern, bashkëkohor. "Gjermania i ka dhënë
shumë vokacionit tim artistik. Mbi të gjitha konceptin
për t'i parë gjërat në mënyrë
si konkrete dhe të abstraguar. Në Gjermani mësova
të punoj i mbështetur në një koncept.
Përvoja gjermane, parë në aspektin artistik,
është një fat i madh për mua. Gjermania
është për mua vendi i artit, që me piktorët
e tij më të mirë është në
avanguardën e pikturës bashkëkohore. Kjo
më jep mundësi të njoh koncepte, këndvështrime
dhe pikësynime të reja. Kjo është udha,
që pasurohet për mua dhe për këdo tjetër
ne rrethana të tjera." thotë piktori Kucana.
Vlera
universale e "Udhës"
"Udha"
në pikturën e Arben Kucanit është një
shprehje artistike, estetike dhe filozofike e kohës
ku jetojmë. Ato nuk janë rrugë ku individi
dhe shoqëria ecin fizikisht, por udhë ku ata lëvizin
në kuptimin filozofik të kohës, janë
kujtime nga e shkuara dhe përjetime nga e tashmja.
Në ceremoninë e rastit ambasadorja gjermana Carola
Müller-Holtkemper, vlerësoi karakterin filozofik
dhe universal të pikturës së Arben Kucanës.
"Në pikturat e kësaj ekspozite gjithsecili
mund të identifikojë vetveten pasi veprat nuk
tregojnë pamje, figura njerëzore por koncepte"
tha znj. Müller-Holtkemper.
Koncepte universale të shprehura me një larmi
formash artistike
Piktori
Bujar Zajmi, ish professor i Arben Kucanës, në
Liceun Artistik në Tiranë, në vitet 1980-1984
vlerëson atë që Gjermania i dha ish-nxënësit
të tij të talentuar. "Ka përparuar vërtet
shumë. Mua më pëlqen larushmëria e shprehjes
së tij artistike. Në art duhet të kesh gjithmonë
gjendje të reja emocionale dhe Arbeni i ka ato. Ai
është shumë i kultivuar në përdorimin
e ngjyrave. Ka kompozime shumë të gjetura nga
pikëpamja grafike dhe e koloritit. Për më
tepër pas kaq vitesh nuk ka humbur në detin europian,
por ja, nxorri kokën me një nivel dinjitoz,"
thotë piktori Bujar Zaimi.
Dy kohët,
e shkuara në Shqipëri dhe e tashmja në Gjermani
bashkëjetojnë në ndërgjegjen artistike
të Arben Kucanës dhe e bëjnë atë
një artist krej të veçantë, që
pikturon imazhe të larmishme të udhëve të
jetës që nisin dhe nuk mbarojnë, por që
kanë si stacione ngjarje, kujtime, mbresa, realitete
dhe ëndrra.
Autor:
Ani Ruci
Redaktoi:
Lindita Arapi